Perwerde

Peyamên pîrozbahiyê ya Roja Zimanê Dayikê ya Cîhanê

Dîroka Weşanê: 1 ay önce

Peyamên pîrozbahiyê ya Roja Zimanê Dayikê ya Cîhanê

Serok, serokwezîr, hevşaredar û zimannasan peyam li ser zimanê Kurdî dan û girîngiya Roja Zimanê Dayikê ya Cîhanê anîn ziman.

AMÎDA KURDÎ - Serokê PDKê Mesûd Barzanî, Serokê Herêma Kurdistanê Nêçîrvan Barzanî, Serokwezîrê Herêma Kurdistanê Mesrûr Barzanî, Dem Partî, Hevşaredarên Şaredariya Bajarê Mezin a Amedê Serra Bucak û Dogan Hatun, Zimannas Dr. Emîn Ebdulqadir, Hevseroka Saziya Zimanê Kurdî (SZK) Viyan Hesen, Endama MED-DERê û Aktîvîsta Zimanê Kurdî Dîlan Guvenç û Hevseroka Komeleya Lêkolînên Kurdî Remziye Alparslan li ser ziman peyamên girîng dan.

Serokê PDKê Mesûd Barzanî di peyama xwe de bal kişand ser rola sereke ya ziman a di jiyana milet de û diyar kir ku zimanê dayîkê bingeha resenî, nasname, hişyarî û hevdengiya neteweyî ye.

Serokê Herêma Kurdistanê Nêçîrvan Barzanî:

"Di Roja Zimanê Dayîkê ya Cîhanê de, em serbilind in ku Herêma Kurdistanê dergûşa pirrengî û bihevrejiyana pêkhateyên neteweyî, olî û ziman û çandên cuda ye.

Em pêbendbûna xwe ya bi bipêşxistina zimanê dayîkê ji bo hemûyan ducare dikin; ji zimanê Kurdî heta zimanên pêkhateyên neteweyî (Tirkmenî, Suryanî û Ermenî).

Parastina zimanê dayîkê, parastina nasname, dîroka dewlemend û paşeroja Kurdistanê ye."

Serokwezîrê Herêma Kurdistanê Mesrûr Barzanî:

"Herêma Kurdistanê bi hebûna ziman û çandên cuda dewlemend e.

Cihê şanaziyê ye ku hemû pêkhateyên Kurdistanê, bi azadî bi zimanê dayîka xwe diaxivin û dixwînin."

Dem Parti:

Roja Zimanê Dayikê ya Cîhanê ji hemû gele me re pîroz be.

Hevşaredarên Şaredariya Bajarê Mezin a Amedê Serra Bucak û Dogan Hatun:

Ziman; bîr, nasname û rihê mirovekî ye. Parastin, pêşxistin û veguhastina zimanê me yê dayikê ji bo nifşên paşerojê, berpirsiyariya me ya hevpar e. Bi hêviya cîhaneke ku tê de ziman û çandên cuda bi azadî dijîn û piralî wekî dewlemendî tê dîtin, em Roja Zimanê Dayikê ya Cîhanê pîroz dikin.

Zimannas Dr. Emîn Ebdulqadir:

‘’Fêrbûna Îngilîzî, Erebî yan jî Spanyolî girîng e lê nabe ku ev ziman bikevin cihê zimanê dayîkê û nasnameya me."

Hevseroka Saziya Zimanê Kurdî (SZK) Viyan Hesen:

"Çawa ku li Şamê Akademiya Zimanê Erebî heye û xwedî statuyeke yasayî ye, divê Saziya Zimanê Kurdî yan jî Akademiya Zimanê Kurdî jî bi heman mafan li Sûriyeyê were naskirin.

Endama MED-DERê û Aktîvîsta Zimanê Kurdî Dîlan Guvenç:

“Her gel bi zimanê xwe heye. Em jî dibêjin em bi zimanê xwe hene.

Em dibêjin perwerdeya bi zimanê Kurdî mafekî bingehîn û gerdûnî ye. Divê dewleta Tirk jî qebûl bike.’’

Hevseroka Komeleya Lêkolînên Kurdî Remziye Alparslan:

"Heta zimanê Kurdî nekeve nav sîstema perwerdeyê, xilasiya wê tune û dê tenê xwe li ser pêyan bihêle. Armanca me mezintir e û em dixwazin Kurdî bibe zimanê jiyana me."