Çewlîg de mergê cemedî: Şaredarî mesulîyet qebul nêkena, keye şino mehkeme

Dîroka Weşanê: 2 ay önce

Çewlîg de keyeyê Fatma Baylaze a ke bîna ser ra cemed kewt war û a bin de mend û merd, seba akerdişê dewa hazirîye keno.

  AMÎDA KURDÎ - Çewlîg de emser zimistan gorê serranê verênan xidar vîyareno. Rayîrê mîyanênî û peyarayîrî bi hetê beledîye ra hol nêameyî pakkerdiş.

Cinîya 55 serre merd

31ê Çele de, Mehleya Merkezî ya Înonuyî de wexto ke Fatma Baylaz (55) verê yew bîna de rayra şîyêne, koma cemedî ya serê banî kewte aye ser. Baylaza 55 serre ya ke giran birîndar wedarîya Nêweşxaneyê Dewlete yê Çewlîgî, la pa pêro midaxeleyanê doktoran nêxelesîya û merd.

Dima mergê Baylaze, Çewlîgijan hêrê xo vera beledîye mojna ke çira karê xo nêkena. Şarî pawit ke şaredarîye tedbîranê laziman bigîro la şaredarî tedbîrî nêgirewtî. Keye, seba ke mesulî bêrê vînayîş û muhakemekerdiş, hazirîya akerdişê dewa keno.

Şaredarîye: Mesulîyetê ma çi no

Şaredarîya Çewlîgî ya ke şar tira razî nîyo, roja diyîne ya tazîyeya Fatma Baylaze de medyayê sosyale ser o yew vîdeo pare kerd û xo pawit. Şaredarîye îşaretê Qanûnê Mulkîyetê Qatan (Kat Mülkiyeti Kanunu) û mewzuatî kerd; va ke mesulîyetê pakkerdişê vewre û cemedê serê ban bi temamî ê wayîranê bîna û îdareyê sîteyan o.

Mesaja şaredarîye raya pêroyî de bî sebebê reaksîyonan. Hemserekê Wîlayetê Çewlîgî yê DEM Partî Sedat Ormangorenî şaredarîye bi ‘bêqabîlîyetî’ sûcdar kerde.

Ormangorenî va: “Hema 2 rojî yo ma Fatma Baylaze vîndî kerda. tazîyeya)aye dewam kena. La na Şaredarîya Çewlîgî ya bêqabîliyete, vana ke înan heta nika 758 bînayî pak kerdê û ser de vana 'la mesulîyetê ma nîyo'.

Pisporek: No davetîyeya cînayetî yo

Derheqê munaqeşeyan de, Pisporê Weşîye û Ewleyîya Karî (ÎSG) Abdurrahîm Dogruyî Amîda Haberî rê qisey kerd.

Dogruyî îzah kerd ke cigêrayîşanê xo de ey dîyo ke zafê bînayan de meylê banan rasterast dayo rayîrê peyayan: "Eke dekewtişê bîna rayîr ser o bo, şima nêeşkenê meylê banî bidê o het. No bi resmîyet dawetîyeya cînayetî yo. Eke her çar hetê bîna zî trafîkê peyayan rê akerde bo, uca de ganî banê tîpê terasî bêro tatbîqkerdiş.."

0

Begendim

0

Bayildim

0

Komik

0

Begenmedim

0

Uzgunum

0

Sinirlendim